Phili 4 | BEF | STEP | Ya'mu komopa'ni lepi'ohuna nalalu'nigita komopa'niuba ya'ma lenali kumu mone'a hiti nonebesibe. Lenali foya'nimofihi legeya'a lolo hi'ahago lenali kumu negelo bilata nohube. Lenali amuya melete Sipi Bomofitoga hepite mino hetofa hite ai naga'i lolo hite minalo.

Philippians 4

Polu lalu'agihi lu epi'ehina ka

1 Ya'mu komopa'ni lepi'ohuna nalalu'nigita komopa'niuba ya'ma lenali kumu mone'a hiti nonebesibe. Lenali foya'nimofihi legeya'a lolo hi'ahago lenali kumu negelo bilata nohube. Lenali amuya melete Sipi Bomofitoga hepite mino hetofa hite ai naga'i lolo hite minalo.

2 To Eyuotia to Sitiki letali Sipi Bomofitoga pa'i lolo ha'ina'mu yabe luto luba hilatana'atiti yanamofihi he'mite komopa'atiti molo hepite minala'ibe luto buka notube. 3 To foyalo bo nalalu'nigita, lamana'a lenali ya'ma ana'ate loemo ya'ma etele'mo bati hubo. Etali hiti Kelemeto hiti to nalalu'nigi luga'a hiti ka lamana'amofihi ginaga fise foyamu'i fi hetofa hi nete'ahanamo ni'ibe. Hu'mau ya'ma enali hiti enubuto bi'ehigo minoba minoba huse bona'i enali kumu enigi'ani mone ai'a bukugu fayahi koyo'ehina yabe.

4 Lenali asaga yupahi Sipi Bomofitoga i ke'mete yanamofihi komopa'agu minete lenegelo bite minalo. Nani aku'i lenegekesa lito lilube. Komopatinigu haya inogo minalo.

5 Sipi Bouba imo oto logobisaga mele'isi alube'mu nohinagi bona'i asaga'i ya'ma fulu hite ya suhi ma suhi lu epalalo. 6 Ana'ina mone'namofihi mone'namofihi kehelinogo lenuluhaya metino. Ana'ina'mu sa sa nehitemo Hu'mamofitoga kaga lite ana'ina'mu kehe ite fokehi linogo li huto hu lepinogo lite minalo. 7 Ya hite nehinogo Hu'mamofihi fuluna'auba bona'magi keheli baga meilanauba lenalitoga huto hilibe. To ananauba lenali Yesu Kilisitotoga agoya hu emite neminogo komopatini lenegekesatini le'mo fulu hinogo laga'a hiti minalabe.

8 To nalalu'nigita, kaga mone'ya ma luto lu su hoto nolube. Lamana'amofihi yege fise'na hiti agoya hu emilata nasana hiti to ana'ina hetofana'a to fotogo huto minolata nasana hiti to babahi huto nominana nasana hiti to bu golatanamofihi laga'a to keheli lamana hulatanamofihi ya'ma bati hina nasana hiti to komopatinigu bebe sose'namofihi hapa'a silaga'i enegekesa kehelite minete minalo. 9 Nani bula ola huto keleme keleme ito ana'ina buto le'mo nupa huto lenelepiba lenelepiba hugo bu gete analoko minalabe. Nehinogo Hu'mau fuluna afo'afu lenali hiti minalube'mu hibe.

Ana'ina mone'na emi'ahana'mu Polu fokehi lu'ehina

10 Lenali kana yatama fa'mene mine lite tite yatai aku'i nele'mo lamana hilune'mu nehago yamofihi kehelugo Sipi Bomofitoga buto li so nokigo komopa'nigu bati'na lamana'a nokehelube. Koyapa'i lenali nani kumu kehelise'na keheli'ahanaya ana'ina silaga'na li netalune lite kapo'mu sa hilata nehanauba keta lepesigo menehe'me'ahabe. To yatai aku'i nele'mo bati nehana yabe. 11 Nani lolo huto minoto hilunana'ni meni'igo sa huloto'ni melu'ohube. Nani ana'ina ya hu teginamofihi komopa'agu nohuto kosele'i mehenogo minalunamofihi hapa'a akehelube. 12 Nani lelite tilete to lelite limilete hi netalanamagi fa'mene lolo hise'a lolo nehinogo minalube'mu hube. To nani noloto numu huse'na minolatana to kau'na kanagu minolatana to nasana'ni silaga'i ni'ifi nesi'a ni'ifi komopa'nigu keta mehuse fulu huto minolatana hapa'a akeheli'ohube. 13 Kilisitou nele'mo amuya malago fato fato'na laga mehinanamofihi nanitoga huto hulenogo komopa'nigu keta mehuse bati huto nominobe.

14 Ya hu'ehinaya lenali ya'ma keke boke luse'na kehelito nohugo nele'mo bati hi'ahanamo yamofi kumu nokehelugo etolata nohibe. 15 Filipai hepatoga bona'ise, lenali keheli'ahabe. Nani ka lamana'amu foya hapi huna kanalo ya'ma Filipai hepalugu Masetonia metogati he'mito nobugo Yesuhi bona'a luga'amagi fa'mene neago lenali'i nani lenele'mo hetofa hugo lenalisigo efahi nimigo oto mino'ohutamo ni'ina akeheli'ahabe. 16 To Tesalonika hepatoga nohugo lenali asaga yupahi ana hite efahi malago li'ohuna yabe. 17 Nani ya'ma fe'nohi nimilabe luto noluna ka meni'ibe. O'e, nimi'ahanamofihi legeya'a lenalitoga huto huloto mino lito buto tilibe luto nolube. 18 Yatai ya'ma ana'ina li huto hite mele nete su he'ahana bai toto ni'igo yamofi kumu kehelilabe luto lenofokehi luto fayahi ya'ma koyoto nolepube. Epapolotikou ai'ya lenalitogati ana'ina lito oto nimilago ya'ma fe'noha'ni hiti bo lolo nohube. Lenali ana'ina lolo hi nete'ahanamofihi kehelugo Hu'mamofihi kuguhi keye neemigo tu'a lamana'a nobigo kehelito yauba ai laga besina nasana lolo hibe. 19 To Hu'mau ai lili'na kana Yesu Kilisito kumu molo emina'mu yabe luto ai'a ana'ina samahi tito molo'ehinaloti lepinogo mone kumu sa mehilune'mu habe. 20 Hu'ma afotifihi aitoga ya'ma fokehi noluto yanauba mino lito tito fi besana lolo huto minalibe. Ma'naka.

Keke'i lu epolo'ehina

21 Nani Yesu Kilisitotoga bite hepilete Hu'mamofihi yagapana'a lolo hite nehana bona'i ya'ma keke'ani nolu epologi lu epilo. To nigibo nalalu'nigita nani hiti minolata hi'ahanamo enali hiti keke'i neli epalabe. 22 Ma hepato bona'i Hu'mamofihi yagapana'a lolo hi'ahana bona'i yege yege'i to Lomu kaba bomofihi kele kele pana'i Yesutoga komopa'ani emi'ahana'a hiti keketini li lepelelata nehabe.

23 Sipi Bo Yesu Kilisito lenehe'mose'nauba lenalitoga asaga'i bu foloto minalibe.